اَللّهُمَّ بَلِّغْنَا رَمَضَان

ازقلم:حضرت علامہ مولانا ابوبلال محمد الیاس عطاری قادری رضوی دَامَت بَرَکاتُہُمُ الْعَالِیَہ

مرحبا صد مرحبا! پھر آمدِ رَمضان ہے
کھل اٹھے مُرجھائے دل تازہ ہوا ایمان ہے

یاخدا ہم عاصیوں پر یہ بڑا احسان ہے
زندگی میں پھر عطا ہم کو کیا رَمضان ہے

تجھ پہ صدقے جاؤں رَمضاں !تُو عظیم الشّان ہے
تجھ میں نازِل حق تعالیٰ نے کیا قراٰن ہے

ابر رحمت چھا گیا ہے اور سماں ہے نور نور
فضلِ رب سے مغفرت کا ہو گیا سامان ہے

ہر گھڑی رحمت بھری ہے ہر طرف ہیں برکتیں
ماہِ رَمضاں رحمتوں اور برکتوں کی کان ہے

آگیا رَمضاں عبادت پر کمر اب باندھ لو
فیض لے لو جلد یہ دن تیس کا مہمان ہے

عاصیوں کی مغفرت کا لے کر آیا ہے پیام
جھوم جاؤ مجرمو! رَمضاں مہِ غفران ہے

بھائیو بہنو! کرو سب نیکیوں پر نیکیاں
پڑگئے دوزخ پہ تالے قید میں شیطان ہے

بھائیوبہنو! گناہوں سے سبھی توبہ کرو
خلد کے در کھل گئے ہیں داخلہ آسان ہے

کم ہوا زورِ گنہ اور مسجدیں آباد ہیں
ماہِ رَمضانُ المبارَک کا یہ سب فیضان ہے

روزہ دارو ! جھوم جاؤ کیونکہ دیدارِ خدا
خلد میں ہوگا تمہیں یہ وعدۂ رحمٰن ہے

دو جہاں کی نعمتیں ملتی ہیں روزہ دار کو
جو نہیں رکھتا ہے روزہ وہ بڑا نادان ہے

یاالٰہی! تُو مدینے میں کبھی رَمضاں دکھا
مدّتوں سے دل میں یہ عطارؔ کے ارمان ہے